სიახლეები

2020 წლის 26-29 თებერვალს, ახალგაზრდა პედაგოგთა კავშირის ორგანიზებით ქ. თბილისში თემატური სკოლა გაიმართა, რომელშიც ლიდერთა სკოლის ოზურგეთის, ჩოხატაურისა და თბილისის ჯგუფების მოზარდები მონაწილეობდნენ.
📌თემატური სკოლის ფარგლებში რამდენიმე მნიშვნელოვანი აქტივობა განხორციელდა. კერძოდ: შეხვედრა კონსტიტუციონალისტ ვახუშტი მენაბდესთან. შეხვედრაზე საუბარი წარიმართა ქვეყნის უმაღლესი საკანონმდებლო ორგანოს მუშაობის სპეციფიკისა და ფუნქციების შესახებ.

📌თემატური სკოლის მეორე დღეს გაიმართა შეხვედრა საქართველოს პარლამენტის თავმჯდომარესთან. მოზარდებმა ისაუბრეს იმ გამოწვევებზე, რაც საფრთხეს უქმნის მათ განვითარებას. ყურადღება გამახვილდა ფიზიკური და ფსიქიკური ჯანმრთელობისა და უსაფრთხოების საკითხებზე.
ასევე, მოზარდებს შესაძლებლობა ჰქონდათ ესაუბრათ საქართველოს პარლამენტის გარემოს დაცვისა და ბუნებრივი რესურსების, განათლების, მეცნიერებისა და კულტურის, ჯანმრთელობის დაცვისა და სოციალურ საკითხთა, სპორტისა და ახალგაზრდულ საქმეთა კომიტეტების თავმჯდომარეებთან. ლიდერთა სკოლის მოსწავლეებმა შეხვედრაზე ღიად ისაუბრეს საჯარო სკოლებში არსებულ პრობლემებზე, რომლებიც აფერხებს ან საფრთხეს უქმნის მოზარდთა განვითარებას. განსაკუთრებით აღინიშნა ისეთი საკითხები, როგორიცაა: სასკოლო ინფრასტრუქტურა; სპორტის გაკვეთილები და სპორტული ინფრასტრუქტურა; კვების ბლოკი და მასთან დაკავშირებული საფრთხეები; გამწვანება და ეკოლოგიურად სუფთა გარემო; თანამედროვე ტექნოლოგიების დანერგვა საგანმანათლებლო პროცესის გაუმჯობესების მიზნით.